Hálendisvakt Landsbjargar hafin - 2.000 beiðnir bárust í fyrra

Fyrsta hálendisvakt Slysavarnafélagsins Landsbjargar hófst í gær. Hátt í tvö þúsund hjálparbeiðnir bárust frá ferðamönnum í kröggum síðasta sumar og líkur eru á að þeim muni fjölga í ár. Formaður Landsbjargar kallar eftir aukinni fræðslu fyrir ferðamenn um þær hættur sem leynast á hálendinu.

Slysavarnafélagið Landsbjörg undirbýr sig nú fyrir ferðamannastrauminn á hálendið. Hópar skipaðir sjálfboðaliðum munu standa vaktina á fjórum stöðum á hálendinu yfir sumartímann en fyrstu teymin lögðu af stað í gær.

Verkefnið stendur í átta vikur en síðasta sumar bárust tæplega tvö þúsund tilkynningar og hjálparbeiðnir inn á borð björgunarsveita á hálendinu.

„Meirihlutinn af þessum beiðnum tekur til ferðafólks sem lendir í erfiðum aðstæðum,“ segir Hörður Már Harðarson, formaður Slysavarnafélagsins Landsbjargar. „Ýmist þurfa þau leiðbeiningar eða leiðsögn við að fara yfir á.“

„Þó eru þarna tugir — ef ekki hundruðir — tilfella þar sem að skiptir verulega máli að við séum til staðar. Í raun eru þarna nokkur tilfelli þar sem að lífum var bjargað.“

Svo gæti farið að þessum atvikum fjölgi nokkuð í ár, enda er líklegt að ferðamönnum fjölgi í sumar í takt við þróun síðustu ára. Hörður Már bendir á að með auknum fjölda ferðamanna sé nauðsynlegt að efla þau úrræði sem standa til boða. Ótækt sé að það séu fyrst og fremst hópar skipaðir sjálfboðaliðum sem þjónusti ferðamenn í kröggum.

Þá ítrekar hann að nauðsynlegt sé að fræða ferðamenn um þær fjölmörgu hættur sem leynast á hálendinu.

„Við höfum, ásamt fleirum, haft áhyggjur, af þessu og rekum í samstarfi við helstu ferðaþjónustuaðila vefinn SafeTravel.is. Þar hefur meginmarkmiðið verið að fræða ferðamenn og upplýsa um þær hættur sem á Íslandi eru,“ segir Hörður Már og bætir við: „Ég er sannfærður um að það megi gera betur í þessum efnum. Eins og með aðrar forvarnir, þá er fræðslan lykillinn.“