Stelpurnar standa í stað

Íslenska kvennalandsliðið er í fimmtánda sæti styrkleikalista Alþjóðaknattspyrnusambansins, FIFA, og stendur í stað frá síðustu útgáfu.

Stelpurnar töpuðu í gær fyrir Danmörku, 2-0, í síðasta æfingaleik sínum fyrir EM í Svíþjóð sem hefst í næsta mánuði.

Þar er Ísland í riðli með Þýskalandi, sem er í öðru sæti listans, Noregi (11. sæti) og Hollandi (14. sæti). Af Evrópuþjóðum er Ísland í níunda sæti.

Engin breyting er á efstu fjórum sætunum en Bandaríkin er efst og á eftir Þýskalandi koma Japan og Brasilía. Svíar hoppa upp í fimmta sætið á kostnað Frakka og England, Kanada, Norður-Kórea og Ástralía koma svo næst í röðinni.