Mætti á hesti í stjórnarráðið: "Mér blöskraði"

Maðurinn sem kom ríðandi að stjórnarráðinu fyrr í dag heitir Friðrik Helgason. Eins og Vísir greindi frá var sérsveit lögreglu kölluð til og hesturinn keyrður til síns heima í hestakerru. Í samtali við fréttastofu sagðist Friðrik hafa lent skelfilega illa í kerfinu og vildi mótmæla óréttlæti á heiðarlegu fólki. Hann krefst þess að ríkisstjórnin standi við gefin kosningaloforð um að fella niður skuldir heimilanna.

„Við erum búin að borga heiðarlega af okkar lánum í mörg ár og núna ætla þeir að hirða allt af okkur, húsið, jörðina og hestana. Mér blöskraði og ákvað að ríða niðureftir á góðu hrossi,“ segir Friðrik, sem fór leiðar sinnar á merinni Heru sem er sautján vetra gömul.

Hann segir gjörninginn hafa verið mjög tákrænan þar sem hestarnir séu þeim einstaklega kærir. „Við erum mjög samheldin fjölskyldan og lifum fyrir hestana og útiveruna.“  Þá hafði hann meðferðis bréf og sérstakar fíflaklippur sem hann hafði hugsað sér að afhenda forsætisráðherra.

„Klippurnar eru til að klippa á strengi þar sem alþingismenn eru leikbrúður og ekkert annað. Það eru strengir sem stýra þeim. Ef þau ætla að standa við uppbygginguna þurfa þau verkfæri til þess,“ segir Friðrik. Lögreglan gerði bréfið og verkfærið upptækt þegar hún mætti á staðinn í morgun.

Friðrik segist alltaf hafa staðið í skilum og greitt samviskusamlega af sínum lánum. Eignir hans brunnu svo upp í verðbólgubáli eftir hrun. „Við gáfumst upp og fórum til Umboðsmanns skuldara. Hann vildi ekkert koma til móts við okkur og ætlar bara að hirða allt. Og jafnvel þó þeir taki allt standa níu milljónir eftir. Ég skulda þeim þrátt fyrir að vera búin að borga þetta allt og gott betur.“

Friðrik segist vilja vekja athygli á sínu máli og þannig mörgum öðrum sambærilegum. „Fólk er bara að missa allt og það er ekkert verið að gera í málunum. Jörðin og hestarnir eru lifibrauðið okkar, við viljum auðvitað ekki missa það. Þá stöndum við eftir allslaus með ekkert,“ segir Friðrik.

Rætt verður við Friðrik í kvöldfréttum Stöðvar 2 klukkan 18:30.