Styttir ferðatímann um allt að helming

Hægt er að stytta ferðatíma almenningssamgangna á höfuðborgarsvæðinu stórlega með notkun hraðvagna; sérstaks kerfis sem bætir hraða og áreiðanleika strætisvagna. Stofnkostnaður hraðvagnakerfis er margfalt minni samanborið við léttlestakerfi, sem hefur verið nefnt sem vænlegur kostur.

Þetta er meðal niðurstaðna umferðarverkfræðinganna Grétars Þórs Ævarssonar og Þorsteins R. Hermannssonar, hjá verkfræðistofunni Mannviti. Skipulagsyfirvöld í öllum sveitarfélögum höfuðborgarsvæðisins hafa hugmynd þeirra til skoðunar, enda sameiginlegur eigandi Strætó bs.

Allir sem gerst þekkja telja nauðsynlegt að bæta almenningssamgöngur á Íslandi. Þetta endurspeglast í þingsályktunartillögu um samgönguáætlun 2011-2022 þar sem segir að í samvinnu við sveitarfélögin verði unnið að því að tvöfalda hlutdeild almenningssamgangna í öllum ferðum sem farnar eru á höfuðborgarsvæðinu. Þetta markmið næst aldrei án grundvallarbreytinga og því telja þeir Grétar Þór og Þorsteinn það „skynsamlegt og jafnvel nauðsynlegt“ að þróa hluta almannasamgöngukerfisins yfir í hraðvagnakerfi.

Þorsteinn segir að hraðvagnakerfi í borgum af sömu stærðargráðu og höfuðborgarsvæðið sé víða að finna. Eins í stærri borgum, þar á meðal í Seattle í Bandaríkjunum þar sem þeir Grétar dvöldu við verkfræðinám. „Þar var umræða um léttlestakerfi en menn náðu því aldrei heim og saman að ávinningurinn svaraði kostnaði. Hvað þá hér heima þar sem engir eru lestarteinarnir og aðrir innviðir sem verða að vera til staðar – og þá er þekkingin enn ónefnd,“ segir Þorsteinn.

Hraðvagnakerfi er nokkurs konar millistig milli hefðbundinna strætisvagnakerfa og lestakerfa. Hugmyndin eins og hún stendur í dag snýst um hraðvagna á leið 1 hjá Strætó (S1) sem fyrsta áfanga, en þar liggja fyrir hugmyndir um léttlest.

Áætlað er að stofnkostnaður hraðvagnaleiðar milli samgöngumiðstöðvar í Vatnsmýri (BSÍ) og verslunarmiðstöðvarinnar Fjarðar í Hafnarfirði sé á bilinu sex til sjö milljarðar króna. Inni í þeirri áætlun eru sérreinar og aðrar forgangsaðgerðir, biðstöðvar og vagnar.