Jakki Hermanns var sleginn á 400 þúsund krónur

Golfmót Hermann Hreiðarssonar - Herminatior - tókst vel en það fór að þessu sinni fram á Leynisvellinum á Akranesi. Strax að loknu móti var farið með þátttakendur á Herrakvöld Hermanns, sem var haldið í húsi Iðu í Reykjavík, og þar tók við heljarinnar veisla; verðlaunaafhendingar, uppboð, happadrætti og allskyns skemmtiatriði að hætti Eyjamanna.

Sigurvegarar í mótinu urðu þeir Hjalti Harðarsson og Heiðar Helguson sem sigruðu á 44 punktum. Í öðru sæti urðu tónlistarbræðurnir Örlygur Smári og Beggi Smári. Í þriðja sæti urðu svo þeir Guðlaugur Magnússon og Gísli Steinar Gíslason en þeir voru jafnframt kjörnir best klæddu keppendurnir.

Herminator er fjáröflunarmót, golfað til góðs, en þegar þetta er skrifað liggur uppgjör ekki fyrir né heldur hvaða málefni það er sem Hermann hyggst styrkja. Miðað við þær fúlgur fjár sem skiptu um hendur á uppboðinu má gera ráð fyrir að vel hafi til tekist að afla fjár til góðs málefnis. Þannig bauð Guðni Rafn Eiríksson 400 þúsund krónur í jakka Hermanns og var hann honum sleginn.

Sjá fleiri myndir hér.