Fjöldauppsagnir á skrifstofu Samfylkingarinnar

Öllum starfsmönnum skrifstofu Samfylkingarinnar nema tveimur hefur verið sagt upp störfum. Starfsmennirnir eru átta talsins en sex þeirra hefur verið sagt upp.

Margrét K. Sverrisdóttir, formaður framkvæmdastjórnar Samfylkingarinnar, segir uppsagnirnar eðlilegar í ljósi samdráttar á fylgi flokksins. „Það var mjög eðlilegt, og var gert til að hægt væri að endurskipuleggja starfið. Það þurfti að stokka upp og svo er verið að vinna í því hvort verði af endurráðningum. Það er alveg ljóst að það þarf að rifa seglin og við viljum vera ábyrg. Þetta kemur ekki neinum á óvart í ljósi kosningaúrslitanna," segir Margrét.

Hún segir fjárráð flokksins ekki eins góð og áður. „Tekjur flokksins lækka þegar fylgið er minnkandi. Þetta er ekki gert af neinum öðrum orsökum en til að endurskipuleggja og hafa svigrúm. Það blasir við mér að það sé mjög æskilegt að leitast við að virkja þingflokk og flokk vel saman og við ætlum að horfa á hvernig það verður best gert," segir Margrét.

Margrét neitar að uppsagnirnar séu vegna ágreinings innan flokksins. „Þetta er bara gert til að halda skynsamlega á málunum í ljósi niðurstaðna kosninga. Þetta er allt gert í sátt við þá sem hafa unnið með okkur enda allir á sama báti og róa í sömu átt."