Vilja fresta þingi í haust vegna fjárlagagerðar

Forsætisráðherra og fjármálaráðherra óskuðu eftir því á fundi með oddvitum stjórnarandstöðuflokkanna að þingi yrði frestað í haust um þrjár vikur. Ástæðan er sú að ríkisstjórnin telur að ekki takist að ljúka gerð fjárlaga í tæka tíð. Fjárlagagat vegna aðgerða á sumarþingi nálgast 20 milljarða króna.

Sigmundur Davíð Gunnlaugsson og Bjarni Benediktsson funduðu í síðustu viku með Árna Páli Árnasyni, Katrínu Jakobsdóttur, Guðmundi Steingrímssyni og Jóni Þór Ólafssyni.

Tilgangur fundarins var, samkvæmt heimildum fréttastofunnar, að óska eftir því að þingsetningu í haust yrði frestað þar sem ekki tækist að ljúka gerð fjárlaga í tæka tíð, en fyrsta þingmálið sem lagt er fram við upphaf þings að hausti er fjárlagafrumvarpið.

Leggja áherslu á samstöðu um breytingarnar

Skýringarnar sem gefnar voru á fundinum var sú að fjárlögin yrðu ekki tilbúin í byrjun september. Samhliða gerð fjárlaga þarf að leggja fram í fyrsta sinn frumvarp um tekjuöflun, þ.e bandorminn svokallaða, en hingað til hefur fjármálaráðherra verið heimilt að leggja það fram síðar. Á fundinum í síðustu viku var rætt um að fresta einnig framlagningu þessa frumvarps. Breyta þarf þingskaparlögum ef þetta á að ganga eftir. Samkvæmt upplýsingum fréttastofu leggja formenn stjórnarflokkanna ríka áherslu á að samstaða skapist um þetta á Alþingi.  

Samkvæmt þingskaparlögum er samkomudagur þingsins annar þriðjudagur í september, sem er 10. september næstkomandi. Á fundinum munu ráðherrarnir tveir hafa farið fram á að þinginu yrði frestað til 1. október.

Ráðherrarnir funduðu með oddvitum stjórnarandstöðuflokkanna öðru sinni í dag vegna málsins. Þessum fundi lauk skömmu fyrir kl. fimm í dag. Ráðherrarnir gáfu ekki færi á viðtali nú síðdegis vegna anna, en þeir voru báðir fastir á fundum. Bjarni Benediktsson sagði hins vegar í samtali við fréttastofu að engin niðurstaða hefði fengist. Áfram yrði fundað um málið. 

Auka útgjöld ríkisins og draga úr tekjum þess

Ríkisstjórnin hefur strax á fyrstu vikum sínum kynnt mál sem annars vegar auka útgjöld ríkisins og hins vegar draga úr tekjum þess. Sum þessara mála hafa þegar raungerst í formi lagafrumvarpa. 

Hér má nefna minni tekjur af veiðigjöldum, en frumvörp þess efnis liggja fyrir þinginu. Þá má nefna frumvarp um afnám hækkunar virðisaukaskatts á gistiþjónustu úr 7 prósentum í 14 prósent. Þá eru uppi áform um lækkun tryggingargjalds á fyrirtæki, þótt prósentan hafi ekki verið kynnt opinberlega. Ríkissjóður verður jafnframt fyrir tekjumissi þegar ákvæði um tímabundinn auðlegðarskatt rennur út. Í lögunum um hann var sólarlagsákvæði en fyrrverandi ríkisstjórn hafði uppi áform um framlengingu þess. Ekki stendur til að endurnýja það. Þannig falla lögin sjálfkrafa úr gildi um næstu áramót. 

Ljóst er að ef markmið um jöfnuð í ríkisfjármálum á að halda þarf að skera niður á móti þessum tekjumissi ef ekki koma til örvandi aðgerðir sem auka tekjur ríkissjóðs, en formenn stjórnarflokkanna hafa lagt ríka áherslu á að senda jákvæð skilaboð út í atvinnulífið.