Tugir íhuga að stíga fram eftir viðtalið

Á fjórða tug þolenda kynferðisofbeldis, af báðum kynjum, hafa haft samband við Maríu Rut Kristinsdóttur, formann Stúdentaráðs, eftir einlægt viðtal við hana í Fréttablaðinu um helgina. Þar segir hún meðal annars frá því þegar hún varð fyrir kynferðislegu ofbeldi í æsku.

María Rut sagði fyrst frá ofbeldinu þegar hún var 17 ára en nú er hún 24 ára gömul og segist vera frjáls undan martröðinni.

Hún steig fram í þeirri von að geta verið öðrum innblástur sem búa yfir svipaðri lífsreynslu og hún.

„Ég hef fengið gríðarlega mikil og jákvæð viðbrögð eftir viðtalið. Fólk er búið að hafa samband við mig og segja að frásögn mín hafi veitt því kjark og vilja til að stíga fram og segja frá sinni lífreynslu,“ segir María Rut og bætir við að henni þyki slíkt afar dýrmætt.

„Það sem ég segi við þetta fólk er að mikilvægast af öllu sé að segja frá. Á meðan þetta er einungis leyndarmál tveggja einstaklinga gerist ekki neitt og þolendur sitja uppi með svartan köggul í sálinni,“ segir María Rut og bætir við hún reyni eftir bestu getu að svara öllum sem haft hafi samband.

„Með þessu viðtali er ég vissulega að taka áhættu en í leiðinni að gera umræðuna opnari, sem veitir fólki styrk til þess að stíga fram með sín leyndarmál. Með opnari umræðu hættir þetta smám saman að vera feimnismál fyrir þolendur kynferðisofbeldis og ábyrgðin flyst yfir á gerandann.“

María Rut hefur tekið að sér það hlutverk að vera talsmaður Druslugöngunnar í ár, sem hún segir vera einstakan heiður. „Það er nú orðið mitt hjartans mál að vekja athygli á kynferðisofbeldi og að ábyrgðin eigi ekki að liggja á þolendum heldur gerendum,“ segir María Rut. Druslugangan verður haldin 27. júlí næstkomandi í þriðja sinn.

„Það er svo mikið til af brotnum sálum sem sjá enga lausn. Stærsta skrefið er að segja frá og ég er dæmi um það. Nú er mitt mál hætt að standa í vegi fyrir mér sem gerir það að verkum að nú er allt orðið svo miklu betra og bjartara,“ segir María, sem vonar að sem flestir sem lent hafi í ofbeldi af þessu tagi finni kjarkinn til að segja frá. 

Sýnir hugrekki og styrk

Guðrún Jónsdóttir, talskona Stígamóta, segir að María Rut hafi sýnt mikið hugrekki með því að stíga fram opinberlega.

„Venjan er sú að svona viðtöl leiða til þess að fleiri treysta sér til að skoða eigin mál. Ég tel að það geti verið hvetjandi fyrir aðra að hlusta á fólk sem tekur ekki lengur ábyrgð á ofbeldi sem aðrir frömdu gegn því,“ segir Guðrún en bætir þó við að fólk þurfi að hugsa sig vel um áður en út í slíkt sé farið vegna þess að því geti jafnframt fylgt mikið álag.

„Þegar fólk er búið að vinna með sjálft sig og varpa af sér skömm og sektarkennd, eins og María Rut hefur greinilega gert, getur það verið mikilvægur liður í bataferli að segja frá sögu sinni opinberlega til að hjálpa öðrum,“ segir Guðrún, sem telur hugrekki og styrk Maríu afar mikilvægan og frásögn hennar hið besta mál.