Stefán Karl skipti sér af einelti í Vesturbænum

Leikarinn Stefán Karl Stefánsson skrifar um leiðinlegt atvik sem hann varð vitni að í gærkvöldi þar sem tveir ungir drengir stóðu úti á götu og öskruðu að öðrum dreng að hann væri „fituklessa“ og „helvítis hommi“.

„Ég sat inni í bílnum mínum, tveimur götum frá og heyrði hvert orð,“ skrifar Stefán á Facebook, en rúmlega fjögur hundruð hafa deilt stöðuuppfærslunni á aðeins tveimur klukkustundum.

„Eftir um 3-5 mínútur sá ég að enginn vitjaði þeirra svo ég bakkaði rólega upp að þeim og spurði hvort þetta væri eitthvað sem þeir hefðu lært heima hjá sér eða í skólanum.“

Stefán segir fjölda fullorðins fólks hafa verið úti í glugga að fylgjast með drengjunum en enginn hafi gert neitt.

„Fólki finnst þetta nefnilega ekki koma sér við, því finnst ekki koma sér við að tveir ungir drengir hertaki götuna fyrir utan heimili þeirra og hrópi viðbjóðsleg orð að öðru fólki. Kannski er ég algerlega úr takti við "núið" og kannski er þetta eitthvað sem viðgengst sem hluti af því að nú er að koma sumar og börn fara að leika sér seint á kvöldin úti á götu við það að æpa ókvæðisorð hvert að öðru, veit það ekki.“

Stefán talar um „samfélagslegt samþykki fyrir ofbeldi gagnvart og meðal barna“ og hvetur fólk til þess að skipta sér af, verði það vitni að slíku.

„Það er alveg sama hvort verið er að berja mann með hafnaboltakylfu á bílaplaninu hjá ykkur eða börn að öskra viðbjóð að öðrum börnum. "Högg tungunnar brjóta bein" og flokkast undir annarskonar barsmíðar. Kennum börnunum okkar að það er ekki fallegt að kalla annað fólk "Fituklessur" og "Helvítis homma", það er í rauninni mjög gróft ofbeldi og munnsöfnuður sem hæfir ekki ungum og fallegum drengjum sem eiga framtíðina fyrir sér.“