Nadal vann sitt 38. mót á leir

Spánverjinn Rafael Nadal sigraði Mexican Open mótið um helgina þegar hann vann landa sinn David Ferrer í tveimur settum 6-0 og 6-2 í úrslitum en viðureignin tók aðeins 65 mínútur.

Þetta er í annað skipti sem Nadal vinnur mót síðan hann snéri til baka úr meiðslum fyrir nokkrum vikum.

Þetta er í 38. skipti sem Nadal vinnur mót á leir en hann er jafnan kallaður konungur leirsins.

Nadal sem er í dag númer fimm á heimslistanum var frá keppni í sjö mánuði vegna meiðsla í hné.

„Það er frábært að vera komin aftur á völlinn," sagði Nadal eftir sigurinn.

„Ég verð að þakka fjölskyldu minni fyrir allan þann stuðning sem ég hef fengið og einnig þakka ég öllum þeim sem komu að endurhæfingu minni."