Göngudeild geðdeildar á Akureyri annar ekki eftirspurn

Eftirspurn eftir göngudeildarþjónustu geðdeildar Fjórðungssjúkrahússins á Akureyri hefur stóraukist og er nú umfram það sem göngudeildin ræður við. Þetta segir í greinargerð frá sjúkrahúsinu vegna fréttaflutnings af geðheilbrigðisþjónustu undanfarna daga. Fréttablaðið hefur meðal annars fjallað um sjálfsvíg á spítalanum.

Í greinargerð framkvæmdastjórnar sjúkrahússins segir hins vegar að það sé ekki rétt sem fram hafi komið að enga þjónustu sé að hafa fyrir alvarlega veikt fólk, heldur sé forgangsraðað og sjúklingar með alvarlegustu veikindin fái þjónustu fyrirvaralaust enda sé bráðaþjónusta sjúkrahússins óbreytt. Aukin eftirspurn eftir geðþjónustu sé rakin til þjóðfélagsaðstæðna, til fækkunar lækna í heilsugæslu og að litlu leyti til lokunar dagdeildarúrræðis árið 2009.

„Aukin eftirspurn eftir geðþjónustu er rakin til þjóðfélagsaðstæðna, til fækkunar lækna í heilsugæslu og að litlu leyti til lokunar dagdeildarúrræðis árið 2009. Viðtölum á göngudeild hefur fjölgað jafnt og þétt, voru um 3.000 árið 2005 en 4.500 árið 2011, þannig að þjónusta hefur aukist umtalsvert. Árið 2012 fækkaði viðtölum lítillega vegna læknaskorts. Húsrými göngudeildar gerir ráð fyrir dagdeildarstarfsemi og er stefnt að uppbyggingu fagteymis en það er háð frekari fjárveitingum," segir í greinargerðinni.

Hér að neðan má sjá greinargerð geðdeildarinnar.