Stóra smjörmálið: Guðni tekur netdóna til bæna

Fyrir fjórum dögum greindi Vísir frá rannsókn hverrar niðurstaða er að smjör geri menn skapstygga og árásargjarna. Rætt var við Guðna Ágústsson fyrrverandi landbúnaðarráðherra vegna málsins, og hann efaðist mjög um gildi rannsóknarninar. Nema, nú virðist sannleiksgildi niðurstöðu rannsóknarinnar liggja fyrir því nú eru menn komnir í hár saman, vegna smjörsins.

Rassgarnarendi athugasemdakerfisins

Guðni taldi rannsóknina ekki standast og ef svo væri þá eigi niðurstaða hennar alls ekki við um íslenska smjörið því "það er afburðasmjör." Í athugasemdakerfi fetta menn fingur út í málflutning Guðna; kalla hann "eintrjáning", "fáráðling og "risaeðlu". Guðni svarar fastur fyrir í aðsendri grein í Morgunblaðinu í dag. "Mér sýnist þeirra umræða komi úr rassgarnarendanum svo kurteislegt orðalag Skarphéðins í Njálu sé notað. [...] guð fyrirgefi þessum orðhákum og megi ástvinir ennfremur kenna þeim betri siði. Svona menn skemma alla rökræðu og skaða sjálfa sig jafnvel þó þeir hafi allar þær háskólagráður sem þeir státa af."

Hið sýrða smjör

En, þá að rökræðunni. Guðni, telur nefnilega, þegar allt kemur til alls, að nokkuð kunni að vera til í rannsókninni og vitnar til vina sinna sérfræðinga á sviði mjólkurgerðar: "Við búum til okkar smjör úr ferskum rjóma. En víðast hvar annars staðar, í Evrópu og Ameríku, er rjóminn sýrður áður en smjörið er framleitt. Þetta er tvennt ólíkt í bragði; ég hef lúmskan grun um að það sé sýrði rjóminn sem geti hugsanlega framkallað þessa meintu geðvonsku."

En, Guðni hefur ekki bitið úr nálinni með sinn málflutning, því nú víkur sögunni á Facebook, þar sem fráfarandi formaður SÁÁ og mikill sérfræðingur um matargerð, Gunnar Smári Egilsson, tjáir sig um málið og setur á sérfróðan fyrirlestur um smjörið: "Guðni þekkir alveg sitt smjör. Íslenskt smjör er svokallað sætt smjör; það er búið til úr ósýrðum rjóma. Það er því skyldara amerísku iðnaðarsmjöri en evrópsku smöri, sem byggir á hefð sem er okkur því miður glötuð."

Ambassador íslensku kýrinnar

Gunnar Smári bendir á að íslenska smjörið sé minna feitt en evrópskt smjör almennt; eða 81% á móti 84% (oftast). Minni fita geri íslenska smjörið hvorki betra til baksturs né matargerðar, frekar öfugt segir Gunnar Smári sem er á skjön við það sem Guðni heldur fram. "Ég efast um íslenskir matreiðslumenn hafi haldið því fram við Guðna (nema þá til að gleðja hann tímabundið). Það sem einna verst við framleiðslu á sætu smjöri (eða ósýrðu smjöri) er að áfirnar sem verða til við framleiðsluna eru miklu lakari vara en létt sýrðar áfir sem renna af smjörinu við framleiðslu úr sýrðum rjóma. Iðnvæðing matarframleiðslunnar svipti okkur þeim góða drykk og einstaka hráefni til matargerðar. Að ósekju mætti Guðni, sérstakur ambassador kýrinnar, knýja bændur og forkólfa matariðnaðarins á Íslandi til að framleiða líka smjör að hætti þjóðlegrar matarmenningar; svo við fengjum aftur að smakka sýrt smjör - en ekki síður sýrðar áfir."