Las ræðu um stjórnarskrána af Facebook í ræðustól

Þingmaður Hreyfingarinnar, Birgitta Jónsdóttir, las úr síma sínum stöðufærslu af Facebook-síðu sinni í ræðustól á Alþingi undir liðnum störf Alþingis, þar sem hún gagnrýndi stöðu stjórnarskrármálsins harkalega.

Í ræðunni sagði hún meðal annars að málið hefði verið sett í „tætara gleymskunnar". Birgitta segir ferlið, sem stjórnarskráin er komin í, sé skammarlegt og það sé aðeins eitt orð yfir það, sem er uppgjöf, að hennar mati.

Formaður Samfylkingarinnar lagði fram á Alþingi í gær ásamt Katrínu Jakobsdóttur formanni VG og Guðmundi Steingrímssyni formanni Bjartrar framtíðar frumvarp til breytingar á stjórnarskrá sem heimilar stjórnarskrárbreytingar á næsta kjörtímabili og tillögu til þingsályktunar um að heildarendurskoðun stjórnarskrárinnar á grundvelli tillagna stjórnlagaráðs verði lokið á 70 ára afmæli lýðveldisins árið 2014.

Þór Saari, sem einnig er í Hreyfingunni, hefur vegna þessa lagt fram vantrauststillögu sem verður líklega ekki tekin fyrir fyrr en á morgun. Magnús Orri Schram, þingmaður Samfylkingarinnar, var harðorður í garð Þórs í ræðu sinni í dag. Þar bað hann Þór um að stíga varlega til jarðar, og sagði það engum öðrum en honum að kenna að stjórnarskrármálið dytti niður dautt, því það væru örlög málsins að hans mati ef tillaga Þórs verður samþykkt.

Hægt er að lesa ræðu Birgittu á Facebook-síðu þingmannsins hér.