Þessir spila á árshátíð Landsbankans

Starfsmannafélag Landsbankans fagnar 85 ára afmæli sínu á laugardaginn þegar árshátíð bankans verður haldin með pompi og prakt.

Þjóðhátíðarþema verður á dagskránni og einvalalið söngvara mætir á svæðið til þess að koma um á annað þúsund starfsmönnum bankans í rétta stemmningu. Meðal þeirra sem fram koma eru Hreimur úr Landi og sonum, Matti Matt úr Pöpunum, Magni, Gylfi Ægisson, Stefán Hilmarsson, Bubbi Morthens og meðlimir Stuðmanna.

Kristján Kristjánsson, upplýsingafulltrúi Landsbankans, segir árshátíðina í ár umtalsvert ódýrari en undanfarin ár. Meðal annars hafi náðst sparnaður með því að halda veisluna í Fífunni í Kópavogi en ekki Laugardalshöll eins og undanfarin ár.

„Við leitum svo alltaf bestu tilboða í mat og annað," segir Kristján. Hann vildi ekki gefa upp kostnaðinn við hátíðina en benti á að hafa yrði í huga að 1800 gestir yrðu á hátíðinni. Bankinn styrkti að sjálfsögðu árshátíðina eins og gengur og gerist hjá öðrum fyrirtækjum.

Stóra stund kvöldsins verður þegar stuðsveitin Retro Stefson stígur á stokk. Þeir sem kjósa að skemmta sér undir gítarleik eiga kost á því að skella sér í gítarpartý í anda hvítu tjaldanna í Eyjum.

Kristján tekur fram að kostnaður við árshátíðina breytist ekki mikið með tilkomu eins eða tveggja söngvara. Fyrrnefndir söngvarar koma ekki fram með hljómsveitum sínum heldur hljómsveit hússins og taka hver nokkur lög.