Mikill fjöldi á Íslandi hefur gripið til aðgerða gegn mannréttindabrotum

Félagar og annað fólk í aðgerðarstarfi Íslandsdeildar Amnesty International gripu 160 þúsund sinnum til aðgerða til stuðnings mannréttindum á árinu sem er að líða. Um er að ræða rúmlega 60 prósent aukningu í aðgerðum frá því á árinu 2012.

Fólk getur tekið þátt í aðgerðum með undirskriftum, bréfum, póstkortum eða á annan hátt. Frá því haustið 2010 hefur Amnesty boðið þeim sem vilja að vera á lista og fá send sms-skilaboð til þess að skrifa undir og mótmæla mannréttindabrotum.

Amnesty sendir þá skilaboð þar sem greint er frá helstu atriðum mannréttindabrotsins sem þeir telja nauðsynlegt að þrýsta á stjórnvöld vegna. Ef viðtakandi skilaboðanna vill getur hann sent skilaboð til baka og þar með er hann kominn á undirskriftarlista Amnesty vegna þess máls. Amnesty sendir svo út bréf til stjórnvalda með öllum undirskrifatlistanum þar sem þrýst er á viðkomandi stjórnvöld að hætta þessum mannréttindabrotum.  

„Við erum með tæplega 16 þúsund manns á sms-listanum,“ segir Torfi Jónsson, starfandi framkvæmdarstjóri  Íslandsdeildar Amnesty International. „Það misjafnt eftir aðgerðum hversu margir taka þátt en þátttakan er oft í kringum 15 prósent“.

Sem dæmi um sms-aðgerðir sem farið var í var að þrýsta á stjórnvöld í Maldíveyjum um að hætta við að refsa 15 ára stúlku sem hafði verið þar í landi. Hún hafði verið dæmd til þess að þola 100 svipuhögg vegna „hórdóms“.

Sms- félagar Amnesty International á Íslandi þrýstu á stjórnvöld í Maldíveyjum í mars 2013 og þær fréttir bárust í ágúst að stúlkunni yrði ekki refsað.

Torfi segir það klárt mál að það hafi verið Amnesty að þakka að stúlkunni var ekki refsað en það var Amnesty sem vakti athygli á málinu og beitti þrýstingi á þarlend stjórnvöld.