Einni og hálfri milljón úthlutað úr minningarsjóði Sigrúnar Mjallar

Fiskbúð Hólmgeirs í Mjóddinni keypti treyjuna hans Arons Pálmarssonar landsliðsmanns í handbolta og leikmanns Kiel í Þýskalandi fyrir 200 þúsund krónur, til styrktar minningarsjóði Sigrúnar Mjallar Jóhannesardóttur.

Í fyrra styrkti Aron minnigarsjóðinn um 450 þúsund krónur og nú gaf hann handboltatreyju til að að styðja við bakið á minningarsjóðnum.

Treyjan mun því að öllum líkindum hanga uppi í fiskbúðinni öllum til gleði. Þetta kemur fram á vefsíðu Jóhannesar Kr. Kristjánssonar en hann er faðir Sigrúnar Mjallar sem lést í janúar árið 2010.

Til viðbótar styrkti fjölskylda í Reykjavík sjóðinn um 300 þúsund krónur. Samtals verða því ein og hálf milljón króna til úthlutunar úr sjóðnum þetta árið. Peningunum er úthlutað á afmælisdegi Sigrúnar Mjallar, 22. desember, en hún hefði orðið 21 árs í ár.

Á vefsíðu Jóhannesar segir að þessir peningar skipti miklu máli því þeir hafa komið að mjög góðum notum í verkefnum sem tengjast skapandi starfi ungmenna sem eru á meðferðarheimilum.

Sjö verkefni sóttu um styrk í Minningarsjóðinn að þessu sinni. Fjölskylda Sigrúnar Mjallar og stjórn Minningarsjóðs Sigrúnar Mjallar þakkar innilega fyrir þennan mikilvæga stuðning frá Fiskbúð Hólmgeirs, Aroni Pálmarssyni og fjölskyldunni sem styrkti sjóðinn.