„Ef menn fara ekki eftir settum reglum, þá skapa þeir hættu"

Eins og fram kom á Vísi lenti ung kona, Elín Þórdís Gísladóttir, í því á Kringlumýrarbraut í gær að fá grjóthnullung af vörubíl á framrúðu bifreiðar sinnar. Höggið var svo mikið að rúðan brotnaði í gegn svo glerbrot og flísar þeyttust um bifreiðina, en í bílnum var einnig 16 mánaða dóttir Elínar. Elín segir að vörubíllinn hafi ekið með mikið af sandi og grjóti og ekki hafi verið breitt yfir farminn. Ljóst er að þær mæðgur eru heppnar að hafa sloppið ómeiddar en atvikið er ekki einsdæmi og í dag hafa fréttastofu borist ábendingar um fleiri slys og óhöpp vegna illa frágenginna farma á vörubílum.

Í umferðarlögum segir að flytja skuli farm þannig að hann hafi ekki í för með sér hættu fyrir menn eða geti valdið tjóni á munum. Þá segir í reglugerð um hleðslu, frágang og merkingu farms að skorða skuli farm ökutækis tryggilega og festa við ökutækið, svo hann byrgi ekki sýn ökumanns eða hætta sé á að hann hreyfist til eða falli af ökutækinu og valdi tjóni. Þar segir einnig að farmur sem fallið geti af ökutæki, skuli bundinn, t.d. með yfirbreiðslu.

Þórhildur Elín Elínardóttir, upplýsingafulltrúi Samgöngustofu, segir reglurnar skýrar og að ætla megi að í tilfelli Elínar hafi ekki verið farið eftir þeim. „Samgöngustofa lítur auðvitað á það alvarlegum augum ef bílstjórar fara ekki eftir gildandi reglum vegna þess að þær eru settar sérstaklega til þess að reyna að koma í veg fyrir tjón og tryggja öryggi vegfarenda. Þannig að ef menn fara ekki eftir settum reglum, þá skapa þeir hættu,“ segir Þórhildur.

Hún segir viðurlög til staðar við brotum af þessu tagi. „Brot á þessum reglum geta valdið sektum eða annarri refsingu, það fer eftir alvarleika mála og öðrum forsendum,“ bendir hún á.

Hver eru þín skilaboð til ökumanna sem eru að keyra um með stór hlöss?

„Farið eftir reglum, þær eru settar með öryggi okkar allra í huga,“ segir Þórhildur að lokum.