Slökkt vegna norðurljósa í kvöld

Norðurljósaspá Veðurstofunnar er góð fyrir kvöldið og hefur Reykjavíkurborg ákveðið að slökkva ljósin á fjórum svæðum í borginni á milli klukkan 21:30 og 22. Svæðin fjögur eru Grafarholt, Seljahverfi í Breiðholti, Öskjuhlíð og Skólavörðuholt.

„Þar sem fyrirvarinn er nánast enginn bið ég ykkur að dreifa þessu sem víðast og njóta með okkur,“ skrifar Dagur B. Eggertsson borgarfulltrúi á Facebook-síðu sína, en hugmyndinni var gaukað að honum af Andra Snæ Magnasyni rithöfundi í morgun.

„Það verður spennandi að sjá hvernig til tekst, en þetta er nokkurs konar hástökk án atrennu,“ skrifar Dagur en rúm klukkustund er síðan farið var í málið. „Við vonum að borgarbúar og gestir borgarinnar taki viljann fyrir verkið. Vil sérstaklega þakka starfsfólki umhverfis- og skipulagssviðs, auk Orkuveitunnar og lögreglunnar í Reykjavík fyrir snör handtök.“

Þeir sem ná góðum myndum af norðurljósunum í kvöld geta sent myndir á ritstjorn@visir.is eða gert # á instagram.