Yfirlæknir varar við sveppanotkun

Lögreglan rannsakar nú mál þar sem maður gekk berserksgang í verslun í Reykjavík undir áhrifum sveppa. Yfirlæknir á Vogi segir marga aldrei bíða þess bætur að neyta ofskynjunarsveppa.

Sveppatímabilið nær hámarki sínu um þessar mundir. Sem fyrr hefur nokkuð borið á því að einstaklingar og hópar geri sér ferð út á tún og tíni sveppi. Lögreglu hefur borist nokkrar tilkynningar um þetta.

Sjálf sveppavíman er ekki ósvipuð þeirri sem fæst af notkun LSD en hún einkennist af miklum og hamlandi ofskynjunum. Lögreglan þarf því oft á tíðum að skerast í leikinn þegar neytandinn tapar áttum. Nokkur slíkt atvik hafa komið upp á síðustu dögum og vikum.

Af alvarlegri málum þessu tengdu má nefna atvik sem átti sér stað í verslun 10-11 í Héðinshúsi í síðustu viku. Þar ruddist óður maður inn í verslunina og hafði í hótunum við starfsfólk áður en hann gekk berserksgang.

Sveppavíman og áhrif hennar eru afar mismunandi eftir einstaklingum. Rétt eins og með önnur ofskynjunarlyf þá er hættan á geðrofi ávallt til staðar.

„Það er hægt að fara í geðrofsástand við sveppaát, geðslagið sem fylgir getur verið mjög mismunandi. Menn geta verið mjög órólegir og liðið illa en menn geta líka verið afar rólegir og innhverfir,“ segir Þórarinn Tyrfingsson, yfirlæknir á Vogi.

Fyrst og fremst er um tilraunaneyslu að ræða þegar ofskynjunarsveppir eru annars vegar. Mest megnis eru þetta unglingar.

„Sumir eru ánægðir með vímuna en sumir fara í geðrofsástand og fara í slæmt ferðalag, þeir bíða þess aldrei bætur og geta ekki notað vímuefni í langan tíma eftir það.“