Gleðigjafinn Gylfi í gleðigöngu Spaugstofunnar

Gylfi Ægisson mun birtast aðdáendum Spaugsstofunnar á Stöð 2 á laugardagskvöld þar sem hann flytur glænýjan brag við hið þekkta lag sitt Sjúddírarírei. Eða ekki verður betur séð en þetta sé Gylfi í föruneyti Spaugsstofumanna, en gæti einnig hugsast að þar fari leikarinn og eftirherman Pálmi Gestsson í mjög svo sannfærandi gervi.

Pálmi segist ekki geta sagt mikið um málið á þessu stigi: "Hann er bara að syngja sjúddírarírei. Nýja útgáfu. Og mun birtast í þættinum okkar nú um helgina. Hann Gylfi, þessi höfðingi, í gleðigöngu okkar þessi gleðigjafi sem hann er. Hann rúllaði því upp."

Gylfi hefur að undanförnu verið umdeildur vegna baráttu sinnar gegn klámi sem hann segir haft fyrir börnum í hinni árlegu gleðigöngu -- Gay Pride.

Spurður hvort þetta þýði þá ekki, á móti, að Spaugsstofan gangi í stuðningsmannahóp Gylfa, í því sem hann kallar stríðið gegn hommunum, segir Pálmi að það verði eiginlega að koma í ljós. "Bakka hann upp í sínu hommastríði? Við tökum enga afstöðu til þess og viljum helst ekki blanda okkur persónuleg gleðimál."

Pálmi birti mynd frá tökustað á Facebooksíðu sinni og þar fer Gylfi á kostum: "Ég hélt þetta væri ég. Kannast samt ekki við húfuna og jakkann," skrifar Gylfi og bætir því við að nú skilji hann hvers vegna Pálmi sé svona mikið kvennagull.