„Merkileg“ niðurstaða sýslumanns

„Þetta er mjög merkileg niðurstaða, segir Reynir Ingibjartsson,“ formaður Hraunavina um það að Sýslumaðurinn í Reykjavík hafi hafnað lögbannsbeiðni vegna framkvæmda í Gálgahrauni á þeim forsendum að náttúruverndarsamtökin fjögur sem fóru fram á beiðnina hefðu ekki lögvarða hagsmuni að gæta í málinu.

Hann minnir á það að Ísland hafi gerst aðili að alþjóðasamningum eins og Árósarsamningum sem tryggja einmitt rétt umhverfissamtaka til þess að leggja mál fyrir dóm. Jafnframt sé þetta hlutverk þeirra viðurkennt í með EES-samningnum.

Ragnheiður Elfa Þorsteinsdóttir héraðsdómslögmaður tekur undir þessi orð Reynis og segist að niðurstaða Sýslumanns hafi þegar verið kærð til héraðsdóms. Í málinu verði tekist á um lögvarða hagsmuni sem hún telur að náttúruverndarsamtökin hafi samkvæmt þessum samningum og skuldbindingum sem Íslands hefur gengist undir með samningunum.

Reyndir segir að samkvæmt þessari niðurstöðu sýslumanns mætti halda að náttúruverndarsamtök séu réttlaus og veltir því fyrir sér hvort starfsmenn sýslumanns séu ekki nægilega upplýstir um breytingar sem orðið hafa á löggjöfinni hvað þetta varðar.

Hann segir að þessi samningur um verkið í Gálgahrauni hafi verið gerður án þess að nokkur vissi af, eftir að náttúruverndarsamtökin hafi höfðað mál til ógildingar á framkvæmdinni. Þegar þeim varð ljóst að samningurinn var gerður eftir að málið var höfðað hafi þau ákveðið að fara fram á lögbann framkvæmdanna á meðan að beðið væri eftir niðurstöðu dómstóla.

Hann telur að þetta mál hljóti að vekja fólk til umhugsunar. „Ég trúi ekki að öðru en að þessu verði kröftuglega mótmælt. Næstkomandi mánudag er dagur íslenskrar náttúru haldinn, dagurinn er einnig afmælisdagur Ómars Ragnarssonar,“ segir Reynir.

„Þetta hefur heilmiklar afleiðingar, það er ekki hægt að una við þessa niðurstöðu. Framkvæmdin sem við kærðum til dómstóla byggir á umhverfismati sem er löngu útrunnið. Umhverfismat er gert til þess að það getir ekki bara hver og einn gert það sem honum sýnist. Það hlýtur þá að vera til einskis að gera slíkt mat ef enginn á aðild að málum þar sem eins og í þessu tilviki sé umhverfismatið löngu útrunnið,“ segir hann.

Rökin um að vegurinn sé svona hættulegur, eru bara bull

Reynir gangrýnir einnig þau rök sem eru notuð til þess að leggja veginn í gegnum hraunið, að vegurinn sem nú sé þarna sé lífshættulegur. Hann telur að þessi vegur sé ekki hættulegri en hver annar. 

Hann bendir á það að ef fólki er svona annt um mannslíf þá væri réttara að nota þessa næstum tvo milljarða sem teknir hafa verið frá í framkvæmdina í Landspítalann. Þar sé virkileg neyð samkvæmt því sem fram hefur komið í fjölmiðlum. Þessa tvo milljarða ætti frekar að nota til að bjarga mannslífum þar.

Hann segir að þessi rök að þessi vegur sé svona hættulegur séu bara bull.