Orðin sem má ekki segja á Anfield

„Þú spilar eins og stelpa", „Stelpustrákur", "sígauni" og „spassi" eru orð sem stuðningsmenn á Anfield Road fá ekki að láta út úr sér án þess að verða refsað.

Öryggisverðir á Anfield, heimavelli Liverpool í ensku úrvalsdeildinni í knattspyrnu, hafa fengið í hendur lista yfir orð og orðalag sem stuðningsmenn á Anfield mega ekki láta út úr sér.

Á listanum má finna til að mynda finna niðrandi orð fyrir samkynhneigða, konur, fatlaða, smávaxna og aðra kynþætti. Listinn á að gera öryggisvörðunum auðveldara fyrir í starfi að meta hvort stuðningsmenn gangi of langt.

Félagið segist ætla að útrýma níð á heimaleikjum sínum hvort sem hann viðkomi trú, kynþætti, kynhneigð, kyni eða fötlun.

Framherji Liverpool, Luis Suarez, var dæmdur í átta leikja bann á síðustu leiktíð fyrir kynþáttaníð í garð Patrice Evra, leikmanns Manchester United. Liverpool var í kjölfarið gagnrýnt töluvert af samfélagi blökkumanna fyrir aðkomu sína að málinu.

Leikmenn Liverpool munu einnig fá leiðbeiningar hvernig þeir skuli haga sér að því er BBC greinir frá.