Enginn vill hjóla í Jón Gnarr

Enginn þeirra sem sátu í borgarstjórn með Ólafi F. Magnússyni þegar hann var gerður að borgarstjóra var reiðubúinn að tjá sig við Vísi um staðhæfingar Þorbjörgu Helgu Vigfúsdóttur borgarfulltrúa í viðtali við Nýtt líf í dag.

Í viðtalinu fullyrðir hún að allir borgarfulltrúar hafi misnotað aðstæður Ólafs og veikindi hans á sínum tíma, en borgarfulltrúar Sjálfstæðisflokksins hafi gengið skrefinu lengra en hinir þegar þeir buðu Ólafi borgarstjórastólinn.

Nokkrir borgarfulltrúanna vildu ekki láta hafa neitt eftir sér vegna veikinda Ólafs á meðan einn sagðist telja að Þorbjörg væri að undirbúa einhvers konar framboð.

Borgarfulltrúar sagðir fullkomlega meðvirkir

„Ég man mjög skýrt eftir því þegar Ólafur hafði verið borgarstjóri í nokkra mánuði og einn úr okkar hópi með þekkingu á geðheilbrigðismálum gekk inn á fund til okkar borgarfulltrúanna og sagði okkur fullkomlega meðvirk,“ segir Þorbjörg í viðtalinu og segir það hafa verið misnotkun á valdi að gera Ólaf að borgarstjóra.

Þá lýsir hún óánægju með samstarf sitt við Vilhjálm Þ. Vilhjálmsson fyrrverandi borgarstjóra.

„Vilhjálmur var vinsæll borgarstjóri í skoðanakönnunum og var fyrst og fremst að reyna að tryggja það. Hann var ekki að hugsa um hópinn sinn. Það var líka einkennandi í REI-málinu. Vilhjálmur fyrirgefur mér örugglega aldrei það sem ég hef sagt og skrifað um það mál.“

Enginn vill hjóla í Jón Gnarr

Um núverandi borgarstjóra, Jón Gnarr, segir Þorbjörg að hann hafi náð kjöri vegna þess að fólk hafi haldið að hægt væri að gera hvern sem er að borgarstjóra eftir það sem á undan hafði gengið.

„Með fullri virðingu fyrir Jóni Gnarr sinnir hann ekki embættismannaskyldum sínum og tekur ekki stefnumótandi ákvarðanir. Hér er allt að drabbast niður og skólabyggingar í borginni leka. Við eigum erfitt með að koma fram í fjölmiðlum og ræða þetta því það vill enginn hjóla í Jón Gnarr.“

Hún segir Jón tala endalaust um sig sem vansælt barn og nemanda án þess að hafa sjálfur stefnu um hvað eigi að gera fyrir börn með geðræn vandamál. „Þetta snýst bara um athygli í fjölmiðlum,“ segir Þorbjörg.