"Ísland er litla landið sem þorir“

Þingmenn úr öllum stjórnarandstöðuflokkunum hafa lagt fram frumvarp þess efnis að bandaríska uppljóstraranum Edward Snowden verði tafarlaust veittur íslenskur ríkisborgararéttur.

Það eru Helgi Hrafn Gunnarsson, Birgitta Jónsdóttir og Jón Þór Ólafsson, þingmenn Pírata sem leggja frumvarpið, ásamt Ögmundi Jónassyni. Páll Valur Björnsson, þingmaður Bjartar framtíðar og Helgi Hjörvar, þingmaður Samfylkingarinnar, eru einnig skráðir fyrir frumvarpinu.

Síðustu vikur hefur heimsbyggðin fylgst með máli Edward Snowdens en þau gögn sem hann lak til breskra fjölmiðla hafa varpað ljósi á gríðarlega umfangsmiklar persónunjósnir bandarískra og breskra yfirvalda.

Ögmundur vakti athygli á máli Snowdens á Alþingi í dag. Hann sagði að Bandaríkjamenn hefðu brotið gegn íslensku stjórnarskránni samkvæmt gögnum Snowdens og að uppljóstrarinn ætti að fá hæli á Íslandi sem pólitískur flóttamaður.

Ögmundur spurði Unni Brá Konráðsdóttur, formann allsherjar- og menntamálanefndar, hvort að nefndin muni beita sér í málinu. Unnur ítrekaði að nefndin hefði ekki tekið málið fyrir og vísaði til þess að hælisumsókn yrði að vera borin fram af einstaklingi sem væri staddur hér á á landi.

„Það liggur fyrir að Snowden vill fá hæli á Íslandi og þess vegna lögðum við fram þessa þingsályktun en hún byggir á sambærilegri ályktun og þegar Bobby Fischer fékk íslenskan ríkisborgararétt,“ segir Birgitta Jónsdóttir, þingmaður Pírata.

„Málið er þannig gagnvart Snowden að hann er hundeltur af bandarískum yfirvöldum. Þetta hefur verið fordæmt af Amnesty International og það hefur verið skorað á Bandaríkjamenn að hætta þessum ofsóknum. Ísland er það land sem hann ræddi fyrst um þegar hann steig fram.“

Bandaríkjamenn hafa sótt hart að þeim löndum sem tekið hafa hælisumsókn Snowdens til skoðunar. Birgitta óttast þó ekki inngrip Bandaríkjamanna.

„Ég held að Ísland muni halda áfram að hafa orð á sér fyrir að vera litla landið sem þorir,“ segir Birgitta að lokum.