Of gróft myndband hjá Justin

Búið er að loka fyrir nýjasta myndband Justins Timberlake á YouTube.

Myndbandið gerði hann við lagið „Tunnel Vision“ en þar má sjá naktar fyrirsætur dansa ögrandi í takt við tónana. Það þykir hins vegar of gróft til almennrar birtingar á síðunni.

Timberlake virðist hafa fetað í fótspor söngvarans Robins Thicke en Vísir sagði frá því í síðustu viku að myndband söngvarans við lagið "Blurred Lines" hefði verið harðlega gagnrýnt um heim allan. Í myndbandinu má sjá kviknaktar fyrirsætur dansa við hlið Thicke, Pharrell Williams og rapparans T.I.

Justin Timberlake virðist þó hafa litlar áhyggjur. Á miðvikudaginn benti hann fylgjendum sínum á Twitter að horfa á myndbandið. „Horfið á myndbandið við Tunnel Vision og undirbúið ykkur... það er ögrandi.“

YouTube hefur hins vegar ekki enn lokað á myndbandið hér og því geta áhugasamir sjálfir tekið ákvörðun um ágæti þess um leið og þeir hafa gert grein fyrir aldri sínum.