Skattamál Dorritar til umfjöllunar

Skattamál Dorritar Moussaieff forsetafrúar hafa verið til umfjöllunar í fjármála- og efnahags-ráðuneytinu. Ráðuneytið hefur synjað fréttastofunni um aðgang að upplýsingum um málið

Skattamál Dorritar Moussaieff forsetafrúar hafa vakið mikla athygli og umræðu hér á landi eftir að Fréttablaðið greindi frá því að forsetafrúin hefði flutt lögheimili sitt til Bretlands.

Áður hafði Viðskiptablaðið greint frá því í ágúst í fyrra að forsetafrúin greiddi enga skatta á Íslandi.

Fréttastofa fékk upplýsingar að skattamál Dorritar hefðu verið til sérstakrar meðferðar í fjármála- og efnahagsráðuneytinu, án þess að fyrir lægi hvers eðlis mál hennar væri þar. Fréttastofan óskaði eftir upplýsingum um málið í krafti upplýsingalaga.

Svar barst frá ráðuneytinu í dag þar sem fréttastofu var tilkynnt að ekki verði veittar upplýsingar um mál forsetafrúarinnar þar sem um sé að ræða fjárhagsmálefni einstaklings sem séu undanþegin aðgangi almennings á grundvelli 9. gr. upplýsingalaga, en þar segir að óheimilt sé að veita almenningi aðgang að gögnum um einka- eða fjárhagsmálefni einstaklinga sem sanngjarnt er og eðlilegt að leynt fari, nema sá samþykki sem í hlut á.

Fréttastofan fór sérstaklega fram á afhendingu hluta skjals ef eitthvað í því væri undanþegið aðgangi, en ekki var tekin afstaða til þess í svari ráðuneytisins.

Í hnotskurn, skattamál Dorritar er til meðferðar í fjármálaráðuneytinu, en ráðuneytið getur ekki upplýst um hvað það snýst.

Synjun ráðuneytisins er kæranleg til úrskurðarnefndar um upplýsingamál.