Fulltrúar VG hafa áhyggjur af Hellisheiðarvirkjun

Fulltrúar VG í umhverfis- og samgöngunefnd annars vegar og atvinnuveganefnd hinsvegar hafa óskað eftir sameiginlegum fundi nefndanna vegna frétta Fréttablaðsins af vandræðum Hellisheiðavirkjunar.

Katrín Jakobsdóttir, formaður Vinstri grænna, segir tilefni fundarins vera frétt Fréttablaðsins um að afköst Heillisheiðarvirkjunar væru minni en áætlanir gerðu ráð fyrir.

„Í ljósi þess að umræðan um þessar jarðvarmavirkjanir hefur verið þannig að þarna sé í raun og veru sjálfbær nýting á ferðinni og síðan birtist þessi frétt er full ástæða fyrir okkur að rýna í og skoða hvað býr að baki. Þess vegna viljum við bara halda þennan sameinaða fund,“ segir Katrín Jakobsdóttir í samtali við Vísi.

„Það þarf í raun að fara yfir þetta, hvað þetta þýði,“ segir Katrín. „í fyrsta lagi bara fyrir þessa virkjun. Þarna er verið að segja í raun og veru að það þurfi stórar framkvæmdir til viðbótar ef virkjunin á að geta staðið við þær áætlanir sem gerðar voru um orkuöflun. Síðan bara að skoða þetta mál í stærra samhengi, það er að segja hvort þessi nýting sé þá í raun og veru ekki eins sjálfbær og hingað til hefur verið talið þannig að við teljum fulla ástæðu til að tala við sérfræðinga og fá þeirra sjónarmið á málin. Það er auðvitað ljóst til að mynda að í nýtingarflokki nýrrar rammaáætlunar eru margar jarðvarmavirkjanir og þetta gefur auðvitað tilefni til þess að skoða það hvort að þar séu einhver ný gögn eða nýjar upplýsingar að koma fram um sjálfbærni þessarar nýtingar."