Óttarr Proppé: Ekkert stressaður fyrir jómfrúarræðunni

"Ég var ekkert stressaður fram úr hófi en það var dálítið sérstakt að koma inn í þingsalinn í fyrsta skipti. Þetta er salur sem ég hef horft á utan frá - í gegnum sjónvarp - alla ævi þannig að það var vissulega sérstök upplifun að koma inn í hann og fara í ræðustólinn," segir Óttarr Proppé, þingmaður Bjartrar framtíðar, sem flutti fyrstu þingræðu sína í gær. Óhætt er að segja að Óttarr hafi slegið í gegn í gær og þykir mörgum sem hann hafi borið af öðrum ræðumönnum.

Býr að reynslu úr rokkinu

Óttarr, sem hefur meðal annars sungið með rokksveitunum Ham og Dr. Spock, segir að reynslan úr rokkinu hafi vissulega komið að góðum notum. Hann segir það ekki hafa verið erfitt að tileinka sér formlegheitin sem viðhöfð eru á þingi enda hafi hann lært ýmislegt í borgarstjórn sem hann sat í, í ein þrjú ár.

"Það var kannski dálítið meiri aðlögun að koma inn í borgarstjórn. En þetta er bara eins og hver önnur vinna eða hvað annað sem maður tekur sér fyrir hendur. Þú lærir að stilla þig af miðað við umhverfið. Það gerir maður í öllu; þú talar hærra aðeins hærra við ömmu en bestu vinina af því að hún heyrir illa og maður hagar kannski orðavalinu líka öðruvísi. Það er líka misjafnt eftir stemningunni í salnum hvernig maður ávarpar rokktónleika. Stundum er ekki hægt að segja neitt annað en: "Er ekki allir í stuði?""

Óttarr situr í utanríkismálanefnd og er 6. varaforseti þingsins. Hann segir utanríkismál hafa verið honum hugleikinn í lengri tíma. "Ég hef verið svo heppinn að vera svolítið í utanríkismálum í gegnum borgarstjórn. Í gegnum stjórn Sambands íslenskra sveitarfélaga hef ég tekið þátt í alþjóðastarfi og komið aðeins inn í Evróupsamstarf á sveitastjórnarstiginu. Mér finnst þetta mjög áhugaverður vettvangur, sem skiptir sérstakalega miklu máli fyrir litla þjóð. Grundvöllurinn að hagsæld okkar eru tengslin við aðrar þjóðir," segir Óttarr.

Mannréttindi skipta máli

Borgarstjórn, með Jón Gnarr í fararbroddi, hefur beitt sér töluvert í mannréttindamálum. Óttarr býst við að halda þeirri stefnu áfram á þingi. "Ég held að mannréttindi skipti mjög miklu máli," segir Óttarr. "Þetta er dálítið spurning hvernig maður stillir sig af í hugsunarhætti. Við Íslendingar höfum verið frekar framarlega í mannréttindamálum - mörgum hverjum - en við megum alltaf gera betur."

Í ræðu sinni í gær sagði Óttarr meðal annars sögu af heimilislausum manni sem hann hitti í Washington, höfuðborg Bandaríkjanna fyrir skömmu. Óttarr gaf honum smápening og kvaddi maðurinn þá með orðunum: "Það er íkorni sem dansar á trjátoppunum en ekki bjarndýrið." Það hafi oft betri áhrif að sýna mýkt og sveigjanleika en að ryðjast áfram með látum.

Þá leyfði hann sér þann galgopaskap, eins og hann orðaði það, að vera bjartsýnn á störf þingsins. En er það vinnandi vegur? "Þingið er metið af sínum störfum og hvernig þingmenn hegða sér. Auðvitað er þetta vinnandi vegur. Það að orða það sem svo að það væri galgopalegt var nú kannski bara út af umræðunni í samfélaginu - þar sem hefur ríkt frekar neikvæð stemning gagnvart þingi og stjórnmálum yfir höfuð," segir Óttarr. "Það er ekkert í spilunum sem segir að þetta sé ekki hægt."

Í meðfylgjandi myndbandi má sjá ræðu Óttarrs Proppé.