„Hún sýndi hugrekki“

Agnes M. Sigurðardóttir, biskup Íslands, skrifar um mál Guðnýjar Jónu Kristjánsdóttur á vefsíðu biskups í kvöld.

„Í tilefni af viðtali við Guðnýju Jónu Kristjánsdóttur í Kastljósi í gærkvöldi og viðtali við Sighvat Karlsson sóknarprest á Húsavík í Fréttablaðinu í dag er mikilvægt að koma eftirfarandi á framfæri. Nauðgun er ofbeldi og ofbeldi á aldrei að líðast. Kirkjan og prestarnir sem lykilstarfsmenn hennar eiga að standa með þolendum og styðja þá í að leita réttar síns."

Agnes segir Guðnýju hafa sýnt hugrekki með því að kæra ofbeldið á sínum tíma og aftur núna með því að segja sögu sína opinberlega.

„Kynferðisbrot eiga ekki að liggja í þagnargildi og mikilvægt er að samfélagið styðji þolendur til að hafa kjark til stíga fram og leita réttar sins. Vitnisburður hennar í Kastljósinu er mikilvægur í því samhengi."

Þá segist biskup hafa, ásamt prófasti Eyjafjarðar- og Þingeyjarprófastsdæmis, rætt við sóknarprestinn á Húsavík og hafa falið vígslubiskupi á Hólum að fylgja málinu eftir.

„Kirkjan hefur einsett sér að vera fyrirmyndarstofnun þegar kemur að viðbrögðum við kynferðisbrotum. Þegar mistök eru gerð í viðbrögðum kirkjunnar þarf að leiðrétta þau og læra af þeim. Þannig ætlar kirkjan að vinna."