Svartsýnar spár í Eurovision: Öndum bara rólega

„Ég fer varlega í að skoða þessar spár og trúa þeim - keppnin er ekki hafin," segir Páll Óskar Hjálmtýsson, okkar helsti Eurovision-sérfræðingur. Veðmálasíðan Betsson.com spáir Íslandi 30. til 34. sæti og aðrar sambærilegar síður spá okkur svipuðum árangri.

Það er Eyþór Ingi Gunnlaugsson, sem syngur lagið Ég á líf í Malmö í Svíþjóð þann 16. maí næstkomandi.

Nú þegar styttist í keppnina eru hinar ýmsu síður byrjaðar að gefa út spár fyrir keppnina. Veðmálasíður gefa einnig út stuðla, því lægri sem stuðullinn er því meiri líkur er á að lagið sigri keppnina. Betsson.com spáir til dæmis Danmörku sigri, Noregi öðru sætinu og Svíþjóð því þriðja. Til dæmis er Danmörk með stuðulinn 3,40 en Ísland 95.

Páll Óskar segir að þessar spár segi lítið. „Ég veit ekki hvernig þetta fólk stendur sig á sviði. Maður þarf alltaf að ítreka það að, það eru þessar þrjár mínútur á sviðinu sem telja. Það skiptir engu máli hversu mörg „hits" tónlistarmyndbandið fær á Youtube. Það er ótrúlegasta fólk sem hefur verið spáð brjáluðu gengi í keppninni, og það hefur jafnvel ekki komist upp úr undanúrslitunum," segir hann og gefur lítið fyrir stuðla veðmálasíðna. „Öndum bara rólega þar til 18. maí rennur upp."

Eyþór Ingi syngur lagið á íslensku, en það er í fyrsta skiptið sem Ísland syngur á móðurmálinu frá árinu 1997. „Þá var ég að keppa fyrir Íslands hönd. En þá átti ég enga aðra kosta völ, við neyddumst til að syngja lögin á okkar tungumáli. Ég hefði kosið að syngja lagið frekar á ensku en því var ekki að skipta."

En hvernig lýst poppkóngnum á að við syngjum á íslensku? „Ég fýla það. Mér finnst þetta vera rétt lesið hjá honum. Íslenskan fer betur þessu lagi en enskan. Afhverju ekki nota þennan valmöguleika, úr því að hann er fyrir hendi? Flytjandinn og lagahöfundurinn hafa frjálst val. Þetta er rétt hjá þeim að syngja á íslensku."

Eyþór Ingi stígur á svið í Malmö þann 16. maí næstkomandi, og gera má ráð fyrir því að öll þjóðin fylgist með - eins og alltaf.