Fullyrt að íslenskt súkkulaði eigi uppruna í barnaþrælkun

Haukur Viðar Alfreðsson skrifar 27. mars 2013 20:11

Talsmaður Íslandsdeildar alþjóðasamtakanna Stop the Traffik fullyrðir að börn í ánauð komi nálægt framleiðslu kakóbauna sem notaðar eru í íslenskt súkkulaði. Samtökin skora á íslenskan almenning að þrýsta á íslenska sælgætisframleiðendur um að hefja framleiðslu á vottuðu súkkulaði.

„Við höfðum samband við öll stóru fyrirtækin hér á landi í fyrra og fengum ekki viðbrögð frá neinum nema Nóa Síríus sem fengu okkur á fund og voru mjög opnir fyrir þessari umfjöllun," segir Elísabet Ingólfsdóttir, meðlimur samtakanna.

„Þeir höfðu greinilega verið undir þrýstingi og höfðu aðeins kynnt sér þessi mál. Við komumst að því að þeir eru að fá kakóbaunir frá tilteknum svissneskum framleiðanda sem er á svörtum lista fyrir að kaupa baunir frá Fílabeinsströndinni, þar sem börn eru í þrælkunarvinnu við kakóframleiðslu. Þeir hjá Nóa sögðust ekki hafa burði í að vera í milliðalausum kaupum við bændur og að þeir væru að skoða þetta, en að þeir væru tortryggnir í garð vottunarfyrirtækjanna."

Elísabet segir lítil börn flutt á milli landa í Vestur Afríku eins og Malí og Búrkína Fasó og þeim sé lofað góð vinna og menntun, og að launin þeirra verði send heim. Svo þegar á staðinn sé komið taki við ólaunuð þrælkunarvinna.

„Þeir hjá Nóa sögðust þurfa að skoða málið nánar og fá vottun sem þeir gætu treyst. Þegar við fiskuðum eftir því hvað það gæti tekið langan tíma fullyrtu þeir að eftir tíu ár yrði búið að kippa málum í lag, og það leist okkur að sjálfsögðu ekkert rosalega vel á."

Elísabet segir að skömmu eftir fundinn hafi starfsfólk Nóa farið í vettvangsferð til Vestur Afríku að skoða kakóframleiðsluna, og þeim hafi ekki litist á blikuna.

„Maður vonar því að þeir flýti ferlinu, en samt getur maður ímyndað sér að ýmislegt hafi verið falið fyrir þeim."

Nói Síríus svaraði áhyggjufullum neytanda á Facebook.

Biðla til neytenda
Samtökin hvetja íslenska neytendur til að senda innlendum sælgætisframleiðendum áskorun um að kippa þessum málum í lag. Nói Síríus fékk fyrirspurn á Facebook-síðu sinni í gær frá áhyggjufullum neytanda, sem hafði áhyggjur af uppruna súkkulaðis fyrirtækisins. Nói svaraði á þá leið að fyrirtækið legði áherslu á að ekkert af vörum þess ætti uppruna sinn í barnaþrælkun. Elísabet fullyrðir þó að svo sé.

„Ef það er ekki vottað þá koma börn nálægt ræktuninni. Ég get því fullyrt að það koma börn nálægt ræktuninni á kakóinu í súkkulaði frá Nóa."

Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.