Hanna Rún: Honum finnst Íslendingar blíðir og rosalega kurteisir

"Heilsan er miklu betri. Bara nokkrir dagar eftir á sýklalyfinu og þá ætti allt að vera orðið gott. Sárin eru að klára að gróa, vika í viðbót og þá ætti þetta allra allra stærsta að vera orðið alveg lokað en ég er samt farin að gera allt eins og ég gerði vanalega, nema dansa," segir Hanna Rún Óladóttir, 22 ára, dansari með meiru spurð hvernig henni líður eftir að hún fékk slæma húðsýkingu á dögunum og hræðilegar kvalir í kjölfarið.

Þá spurðum við Hönnu Rún einnig um ferðlag hennar og rússneska kærastans Nikita Bazev, 25 ára, sem tekur meðal annars þátt í sjónvarpsþættinum Dancing with the stars.

Hvað er framundan hjá þér og Nikita? "Það er Þýskaland í tvo mánuði. Miklar æfingar, keppnir og sýningar og kennsla út í eitt. við verðum að ferðast mikið á meðan við verðum úti. Svo komum við heim daginn fyrir bikarmeistaramót og keppum á því en förum svo strax aftur út til að keppa á öðru móti úti. Þetta ár verður rosalega strembið, mikið um sýningar, keppnir og kennsla út um allan heim."

Hvernig verður dagskráin ykkar í Þýskalandi? "Úff það er rosalega mikið framundan. Ég byrja á því að fara út og við förum að æfa á fullu svo er hann að æfa sex tíma á dag með dömunni sem hann mun dansa við í keppninni Dancing with the stars," segir Hanna Rún og heldur áfram:

"Svo förum við í einkatíma fyrstu vikuna og svo förum við í æfingabúðir til Danmerkur í nokkra daga. Keppum á Ítalíu og fimm öðrum löndum sem ég man ekki nákvæmlega hver eru. Svo förum við til Portúgal að sýna og verðum þar í þrjá daga en við verðum að kenna þar líka. Svo um helgar þá verða keppnirnar í Dancing with the stars í beinni útsendingu og þá fæ ég að slaka á sem áhorfandi á meðan Nikita púlar þannig að þetta verður bara kennsla, æfingar, sýningar og keppnir út í eitt. En svo að sjálfsögðu verður gert eitthvað inn á milli eins og til dæmis þá förum við og horfum á Swan lake ballet og ýmislegt annað."

Hvernig líkar Nikita við Ísland? "Hann er að fíla Ísland í botn. Hann kann rosalega vel við Íslendingana sjálfa. Hann sagði að þeir væru svo opnir og blíðir, rosalega kurteisir og allir kæmu rosalega vel fram við hann. Honum finnst landið okkar fallegt og segist ekkert geta sett út á það nema kannski hvað það eru margar hraðahindranir," segir Hanna Rún og hlær.