Traust á Alþingi og bankakerfi minnst

Almenningur á Íslandi ber mest trausts til Landhelgisgæslunnar en nær níu af hverjum tíu svarendum ber mikið traust til hennar. Þetta kemur fram í nýjum þjóðarpúlsi Capacent.

Næst kemur lögreglan sem nýtur mikils trausts eða 82% landsmanna og í þriðja sæti er Háskóli Íslands en rúmlega 74% svarenda bera mikið traust til hans. Þar næst kemur heilbrigðiskerfið sem nýtur mikils trausts tæplega 66% svarenda. Embætti forseta Íslands kemur þar á eftir með nær 59% en traust til þess embættis var mælt í fyrsta sinn nú.

Þær stofnanir sem lækka marktækt frá því í fyrra eru umboðsmaður Alþingis og heilbrigðiskerfið. Nær 41% ber mikið traust til umboðsmanns Alþingis en í fyrra var það hlutfall 49%. Eins og áður sagði nýtur heilbrigðiskerfið mikils trausts tæplega 66% svarenda en í fyrra var það hlutfall 73%.

Þær stofnanir sem hækka marktækt frá því í fyrra njóta allar einna minnst trausts af þeim stofnunum sem voru mældar. Þær stofnanir sem hækka eru borgarstjórn Reykjavíkur, Seðlabankinn, Fjármálaeftirlitið, þjóðkirkjan og Alþingi. Mest er hækkunin hjá borgarstjórn en þeim fjölgar um 11 prósentustig frá því í fyrra sem bera mikið traust til hennar.

Næst kemur Seðlabankinn með 7 prósentustiga hækkun, þá þjóðkirkjan og Fjármálaeftirlitið með hækkun upp á 6 prósentustig og loks Alþingi með 5 prósentustiga hækkun.

Myndræna framsetningu niðurstöðunnar má sjá á heimasíðu Capacent.