Öllum ferðum Strætó aflýst

Vegna slæmrar færðar og veðurs má búast við miklum seinkunum á öllum leiðum höfuðborgarsvæðisins í dag samkvæmt upplýsingum sem finna má á heimasíðu Strætó.

Nú þegar er ófært í Vatnsendahverfið, Vallarhverfið í Hafnarfirði, Norðlingaholt, Mosfellsbæ, Grafarholt, Grafarvog og Árbæinn. Allar ferðir á leiðum utan höfuðborgarsvæðisins falla niður vegna veðurs. Næst verður athugað með ferðir klukkan tíu í dag.

Farþegar eru beðnir um að fylgjast með gangi mála á heimasíðu Strætó, bus.is, sem og á Facebook síðu Strætó. Uppfært kl.10.30. Öllum ferðum Strætó hefur verið aflýst vegna ófærðar. Einnig hefur Ferðaþjónusta fatlaðra hætt akstri. Unnið verður að því að koma þeim heim sem fóru af stað í morgun. Búið er að fella niður allar ferðir Herjólfs.