Algjört öngþveiti á Vesturlandsvegi: „Umferðin þokast nákvæmlega ekki neitt“

Enn er algjört umferðaröngþveiti á Vesturlandsvegi og bíll við bíl. Ekkert útlit er fyrir að ástandið lagist næstu mínúturnar.

„Ég er búinn að vera á sama reitnum í eina og hálfa klukkustund og umferðin þokast nákvæmlega ekki neitt," segir Þorbjörn Þórðarson fréttamaður á Stöð 2 og Vísi, sem fylgist með því sem fram fer á Vesturlandsvegi. Hann áætlar að þúsundir bíla séu fastir í umferðaröngþveiti.

„Það er ískaldur snjóbylur úti, skyggni er tíu metrar í mesta lagi og það eru það erfiðar aðstæður að þú þarft að berja klakabönd af þurrkum og fleiru," segir Þorbjörn.

Lögreglan á höfuðborgarsvæðinu sendi frá sér tilkynningu í morgun til að vara fólk við því að fara út úr húsi. Símtal til vinar eða lestur góðrar bókar væri betri en óþarfa ferð í óveðrið.