Landhelgisgæslan til aðstoðar vegna ófærðarinnar

Starfsmenn séraðgerða- og sprengjueyðingasviðs Landhelgisgæslunnar voru í morgun kallaðir til aðstoðar lögreglu og slökkviliði höfuðborgarsvæðisins vegna ófærðarinnar. Fylgja ökutæki þeirra nú neyðarbílum í útköll og tryggja greiðan aðgang þeirra um höfuðborgarsvæðið.

Samkvæmt upplýsingum frá Landhelgisgæslunni munu einnig vera dæmi um að vegfarendur á fjallvegum og heiðum um landið hafi gert vart við sig á neyðar- og uppkallsrás skipa í morgun, þ.e. rás 16, og þannig náð sambandi við stjórnstöð Landhelgisgæslunnar sem síðan hefur hefur komið upplýsingum og aðstoðarbeiðnum áfram til lögreglunnar.

Gísli Berg, tæknistjóri á fréttastofu Stöðvar 2 og Vísis, tók meðfylgjandi mynd eftir hádegið í dag í Húsahverfi við Fjölnisvöllinn. Þar hafði bíl augljóslega verið ekið útaf. Fjölmörg umferðaróhöpp hafa verið á höfuðborgarsvæðinu í dag. Mest áberandi var þó óhapp á Hafnarfjarðarveginum þar sem 15-20 bílar lentu í árekstri.