Þeir sem eru með hungruð börn í bílum beðnir um að hringja í 112

Þeir sem eru fastir í bifreiðum með börn sem eru farin að finna til hungurs, eru beðnir um að láta lögregluna vita í síma 112 svo hægt sé að aðstoða. Þetta kemur fram á Facebook-síðu lögreglunnar þar sem hún mun reyna að koma tilkynningum áleiðis til vegfarenda í dag.

Þar kemur einnig fram að Ártúnsbrekkan er enn lokuð vegna bifreiða sem standa þar fastar. Aðreinar af Sæbraut eru stíflaðar vegna bifreiða sem sitja fastar í slaufunum. Bifreiðar virðast ekki ráða við að komast upp Ártúnsbrekku.

Vinnu viðbragðsaðila vegna árekstursins við Kópavogslæk er lokið, en þar lentu um 20 bifreiðar saman fyrr í dag. Engin meiddist alvarlega en mikið eignatjón varð.

Færð í íbúðargötum er orðin mjög erfið, í raun ómöguleg fyrir fólksbíla, að því er kemur fram á Facebook-síðu lögreglunnar.

Kópavogur; Breiðholtsbraut lokuð við Víkurhvarf ekki hægt að ryðja vegna yfirgefinna bifreiða. Færð mjög erfið í Hvarfa- og Kórahverfi. Starfsmenn Kópavogs reyna sitt besta við halda opnu.

Enn eru vandræði á Vesturlandsvegi við Bauhaus, en þar er lokað vegna bifreiða em eru fastar á veginum.