Þessir mega sækja börnin sín í skólann - farið eftir tilmælum lögreglu

Lögregla og almannavarnir á höfuðborgarsvæðinu vilja ítreka enn og aftur mikilvægi þess að börn séu ekki sótt í skólana fyrr en tilkynning þess efnis hefur verið send út frá lögreglu.

Almannavarnir segja að borið hafi töluvert á misvísandi skilaboðum í dag og hafa sumir skólar sent frá sér boð um að börn verði sótt. Fólki er bent á að fylgja tilmælum frá lögreglu varðandi þetta.

Foreldrar skólabarna í skólum vestan Kringlumýrarbrautar mega nú fara að huga að því að sækja börn þar, en aðeins ef þeir eiga auðveldlega tök á því að komast frá heimili eða vinnustað til skólans.

Foreldrar skólabarna í öðrum skólum höfuðborgarsvæðisins eru beðnir um að bíða átekta. Börnin verða áfram í skólunum og vel verður hugsað um þau þar til hægt verður að sækja þau eða flytja þau heim.

Unnið er í því að opna stofnbrautir og í kjölfarið opna út í hverfin. Gert er ráð fyrir að stofnbrautir verði ruddar á næstu tveimur tímum. Afar mikilvægt er að fólk sé ekki á ferli á meðan til þess að auka ekki álag á göturnar.

Þeir sem nauðsynlega þurfa að fara til eða frá Grafarvogi eru beðnir um að fara um Gullinbrú þar sem Víkurvegur er enn ófær.

Reykjanesbraut við Kaplakrika er einnig ófær. Almennt gildir það að suður- og austurbyggðir á höfuðborgarsvæðinu eru illa færar eða ófærar.