Tíu karlmenn leituðu til Neyðarmótttöku vegna nauðgana

Tíu karlmenn leituðu til Neyðarmóttöku vegna nauðgana í fyrra en einn áður. Aftur á móti komu 129 konur á mótttökuna í fyrra en 117 árið áður. 241 kona leitaði til Stígamóta í fyrra og 23 karlmenn. Þessar upplýsingar koma fram í bæklingnum Kynlegar tölur sem mannréttindaskrifstofa og mannréttindaráð Reykjavíkurborgar hafa gefið út í tilefni þess að í dag er alþjóðlegur baráttudagur kvenna fyrir friði og jafnrétti.

Í bæklingnum kemur líka fram að stærsti hluti viðtakenda fjárhagsaðstoðar í Reykjavíkurborg eru einhleypir, barnlausir karlar, eða 1.891. Einstæðar konur með börn koma þar á eftir en þær eru 1.002.

Þar kemur líka fram að fleiri karlar hafa verið í hópi frambjóðenda til Alþingiskosninga í síðustu þrem kosningum, 2003, 2007 og 2009. Fleiri karlar hafa einnig verið kjörnir á þing en fleiri konur en karlar eru varaþingmenn. Til dæmis voru 36 karlar kjörnir á þing árið 2009 en 27 konur. Nokkur munur er einnig á fjölda kjörinna þingmanna annars vegar og þingkvenna hins vegar þegar Reykjavík og landsbyggðin eru borin saman. Í Alþingiskosningunum 2009 voru 12 þingkonur kjörnar í Reykjavík en 10 þingmenn á meðan 26 þingmenn hlutu kosningu í landsbyggðarkjördæmunum en aðeins 15 þingkonur.