Árni útilokar framboð

Árni Þór Sigurðsson hefur ákveðið að gefa ekki kost á sér til framboðs varaformanns hjá Vinstrihreyfingunni grænu framboði.

Árni Þór tilkynnti ákvörðun sína á bloggsíðu sinni í dag. Þar kemur fram að hann hafi talið sér skylt að hugleiða framboð til varaformanns eftir að Katrín Jakobsdóttir, fráfarandi varaformaður, tilkynnti um framboð til formmanns.

„Að vandlega athuguðu máli hef ég komist að þeirri niðurstöðu að gefa ekki kost á mér til varaformennsku. Ég er þakklátur þeim sem hafa hvatt mig í þessu máli og vænti þess að vera áfram í forystusveit hreyfingarinnar, hvar sem kraftar mínir munu nýtast best. Á þeim tímamótum sem við Vinstri græn stöndum nú er mikilvægt að velja hreyfingunni samhenta forystu með breiða skírskotun," segir Árni Þór.

Í samtali við Vísi sagðist Árni ekki hafa gert upp hug sinn hvern hann myndi styðja til embættisins. Líkt og fjallað var um á Vísi fyrr í dag mun Björn Valur Gíslason tilkynna um ákvörðun sína í fyrramálið. Auk þess hefur Daníel Haukur Arnarsson staðfest framboð sitt til varaformanns.

„Nýrrar forystu og frambjóðenda bíður það verkefni að berjast áfram fyrir róttækri umhverfissinnaðri vinstristefnu. Í þeirri baráttu er mikilvægt að byggja á þeim árangri sem hreyfingin hefur náð og í anda þeirra grundvallarsjónarmiða sem hún hefur haft að leiðarljósi, um leið og blásið er til nýrrar sóknar til framtíðar. Ég hlakka til landsfundarins næstkomandi helgi, hvet félaga og stuðningsfólk um allt land til að snúa bökum saman og heiti þeirri forystusveit sem kjörin verður öllu því liðsinni sem mér er fært að veita," segir í bloggfærslu Árna Þórs sem sjá má í heild sinni hér.