Býður sig fram til varaformanns VG

Daníel Haukur Arnarsson, stjórnarmaður í Ungum Vinstri grænum, hefur lýst yfir framboði til varaformanns í Vinstrihreyfingunni grænu framboði. Þetta kemur fram á Smugunni.

„Skemmtilegur og lifandi flokkur þarf skemmtilegan og lifandi varaformann," segir Daníel Haukur í samtali við Smuguna. Haft er eftir Daníel að hugmyndin um framboð hafi komið frá öðrum og vilji hann láta slag standa.

Daníel, sem verður 23 ára síðar í mánuðinum, er sá eini sem tilkynnt hefur opinberlega um framboð í stöðu varaformanns Vinstri Grænna. Björn Valur Gíslason mun greina frá ákvörðun sinni í fyrramálið en Árni Þór Sigurðsson, sem orðaður er við stöðuna, hefur ekkert látið hafa eftir sér um málið.

„Flokkurinn þarf að hugsa vel um baklandið og grasrótin þarf að eiga greiða leið að forystunni. Ég lít svo á að ég sé sjálfur hluti af grasrótinni," segir Daníel sem starfað hefur í hreyfingunni í sex ár. Hann hefur setið í stjórn Ungra Vinstri grænna frá árinu 2007.