Gengu í skrokk á manni með eggvopni og kylfum

Tveir menn réðust á mann í Trönuhrauni í Hafnarfirði í nótt og gengu í skrokk á honum með eggvopni og kylfum.

Að sögn lögreglunnar hófst árásin á því að mennirnir tveir brutu rúður á heimili mannsins með því að kasta í þær grjóti. Síðan réðust þeir til inngöngu á heimilið.

Maðurinn sem varð fyrir árásinni komst sjálfur á slysadeild skömmu eftir klukkan tvö í nótt. Hann var með skurði í andliti eftir eggvopnið og eymsli eftir kylfuhöggin.

Lögreglan segir að sem betur fer hafi skurðirnir verið grunnir og hafi því farið betur en á horfðist. Maðurinn fékk að fara heim til sín um nóttina eftir að gert hafði verið að sárum hans.

Ekki er vitað um tildrög þessarar líkamsárásar en lögreglan rannsakar nú málið og leitar mannanna tveggja sem stóðu að árásinni.