Ölvaður maður keyrði á aðra bifreið í morgun

Tilkynnt var um að bifreið hefði verið ekið aftan á aðra á Ártúnshöfða skömmu fyrir klukkan tíu í morgun. Ökumaðurinn, sem ók bifreið sinni aftan á hina, slasaðist lítillega og var fluttur með sjúkrabifreið á slysadeild í Fossvogi. Hann er grunaður um að hafa verið ölvaður við aksturinn.

Það var svo rétt fyrir hádegi sem lögreglan fékk tilkynningu um annan árekstur nærri Ártúnshöfða, en þá var bifreið ekið í veg fyrir aðra á gatanmótunum. Báðir ökumennirnir voru fluttir með sjúkrabifreið á slysadeild og bifreiðarnar fluttar af vettvangi með kranabifreið.

Um klukkan tvö í dag báðu síðan erlendir ferðamenn um aðstoð vegna ófærðar á Nesjavallaleið. Þar höfðu þeir fest jeppling í snjó. Björgunarsveitarmenn voru ræstir út og fóru til aðstoðar.