Skotárás á Eyrarbakka tengist frásögn af misnotkun

Frásögn stúlku af misnotkun sem hún segist hafa orðið fyrir sem barn tengist skotárás á Eyrarbakka í morgun. Ættingi stúlkunnar mun hafa viljað hefna sín á henni. Aðeins heppni réði því að haglaskot fór ekki inn um glugga þar sem unnusti hennar stóð.

Um klukkan hálf fimm í morgun var tilkynnt um menn á svartri Volkswagen Golf fólksbifreið sem væru að ónáða íbúa í íbúðarhúsi við Eyrargötu á Eyrarbakka. Skömmu síðar var aftur hringt og greint frá því að skotið hefði verið á húsið. Lögreglumenn á Selfossi og sérsveit ríkislögreglustjóra fóru þegar að Eyrarbakka. Sérsveitarlögreglumenn mættu Volkswagen bifreiðinni í Þrengslum og handtóku þar þrjá karlmenn og konu auk þess sem þeir lögðu hald á haglabyssu.

Tildrög árásarinnar má rekja til myndbirtingar á umdeildri síðu af Facebook sem heitir Við viljum að nöfn og myndir af dæmdum barnaníðingum. Meðal annars hafði ung kona birt þar frásögn af misnotkun sem hún segist hafa orðið fyrir af hendi stjúpföður síns þegar hún var barn. Fjölskyldumeðlimur mun hafa orðið henni reiður vegna þessa og viljað hefna sín.

Unga konan greinir frá þessu á síðunni og segir það ástæðuna fyrir því að hún hafi ákveðið að taka út upplýsingarnar. Lögreglan segir að heppni hafa ráðið því að ekki fór verr enda hafi höglin lent á vegg við eldhúsglugga en sambýlismaður konunnar stóð við þann glugga.

Fjórmenningarnir dvelja í fangageymslu lögreglunnar á Selfossi en lögreglan segir tilvikið mjög alvarlegt. Fólkið hefur enn ekki verið úrskurðað í gæsluvarðhald en lögregla segir að framvinda mála verði ákveðin í kvöld að loknum yfirheyrslum.