Flóttamaður handtekinn - grunaður um íkveikju

Lögreglan hefur handtekið einn hælisleitanda sem er grunaður um að hafa kveikt í herbergi á Fit hostel skömmu fyrir hádegi í dag.

Í tilkynningu frá lögreglu kemur fram að lögreglan hafi komið á undan slökkvilinu á vettvang en þegar þangað var komið, mætti henni þykkt reykjarkóf og eldur logaði út um glugga á einu herbergi á annarri hæð hússins.

Lögreglumenn gengu úr skugga um að allir íbúar væru komnir út úr húsinu. Slökkviliðið réð niðurlögum eldsins fljótlega og hófst síðan handa við að reykræsta húsnæðið. Einn íbúi var fluttur á Heilbrigðisstofnun Suðurnesja og lagður inn vegna reykeitrunar samkvæmt upplýsingum frá lögreglu. Annar íbúi var handtekinn og fluttur á lögreglustöð grunaður um íkveikju.

Lögregla er svo búin að hafa samband við félagsmálayfirvöld til að tryggja að aðrir íbúar hússins kæmust í húsaskjól. Lögreglan á Suðurnesjum fer með rannsókn málsins, sem er á frumstigi, og ekki er hægt að veita frekari upplýsingar að svo stöddu að því er fram kemur í tilkynningu.