Ræða síldardauðann í Kolgrafafirði

Síldardauðinn í Kolgrafafirði á Snæfellsnesi verður á dagskrá fundar ríkisstjórnar á morgun. Lagt er til að veitt verði fjármagn til vöktunar ástands fjarðarins og að metin verði þörf og möguleikar á mótvægisaðgerðum vegna atburðarins.

Frá þessu er greint á heimasíðu Atvinnu- og vegaráðuneytisins. Á tveggja mánaða tímabili hefur tvívegis orðið stórfelldur síldardauði í Kolgrafafirði. Talið er að um 30 þúsund tonn af síld hafi drepist í desember og aftur þúsundir tonna á föstudaginn.

Hafrannsóknarstofnun hefur hafið athugun á síðari síldardauðanum og ástandið í firðinum. Umhverfisstofnun hefur sett upp drög að eftirlitsáætlun, sem miðar að því að skoða m.a. útbreiðslu grútar og niðurbrot hans í fjörum, líta eftir grútarblautum fuglum og mæla og skoða ástand sjávar í firðinum.

Náttúrustofa Vesturlands hefur verið á vettvangi og fylgist m.a. með fuglalífi í tengslum við þessa viðburði. Eins hafa íbúar á svæðinu fylgst grannt með gangi mála og m.a. skipulagt hreinsunarátak á morgun þar sem hópur fólks mun ganga um fjöruna og tína síldina upp eftir föngum en stefnt er að nýtingu hennar í minkafóður. Þá munu ráðuneytin tvö funda á morgun með sérfræðistofnunum til að ræða stöðu mála og stilla saman strengi við eftirlit og rannsóknir.