Mikilvægt að rannsaka áhrif síldardauðans á fuglalíf

Heimamenn vinna í dag við að hreinsa upp síld sem hefur drepist í Kolgrafafirði. Mikilvægt er að bregðast hratt við því hreinsunin gengur best á meðan síldin er enn fersk. Svandís Svavarsdóttir, umhverfis- og auðlindaráðherra, bar málið upp í ríkisstjórn í morgun.

Upphaflega drapst mikið af síld í desember og Svandís fór í Kolgrafafjörð fyrir helgi til að kynna sér stöðuna. „Ég fór vestur og kynnti mér málin þar og gekk fjöruna með heimamönnum. Þá var fjaran orðin full af grútarsköflum og niðurbrotið hafði gengið frekar hratt," segir Svandís. Atburðurinn endurtók sig svo fyrir helgi.

„Það sem ég legg til í ríkisstjórn er að við förum í vöktunaráætlun með þeim stofnunum sem hafa yfir þeirri þekkingu að búa sem er ríkust í okkar kerfi. Þar á ég við Umhverfisstofnun, Hafrannsóknarstofnun og Náttúrustofnun Vesturlands sem hefur sérstaklega verið að skoða fuglalífið og áhrif atburðanna á fuglana í firðinum," segir hún. Fulltrúar ráðuneytisins muni hitta þessar stofnanir í dag og ríkisstjórnin hafi ákveðið að veita sex milljónum í verkefnið.

„Við erum í fyrsta lagi að tala um að rýna sérstaklega ástæður þess að þetta kemur upp en ekki er síður mikilvægt að koma á skipulegu og góðu eftirliti með ástandinu og hvernig því vindur fram. Og meta áhrif mengunarinnar á lífríki og mannlíf," segir Svandís.

„Þetta er svo gríðarlegt magn að það er ekki hægt um vik við aðgerðir til þess að hreinsa grút í fjörum. En það er hugsanlegt að ná einhverju upp af síldinni á meðan að hún er fersk og niðurbrotið ekki gengið langt. Það er það sem heimamenn eru að gera í dag," segir Svandís.

Hún segir mikilvægt að heimamenn fái góðar upplýsingar um ástand mála, en einnig sé mikilvægt fyrir vísindasamfélagið að það sé vel haldið utan um allar mælingar og framvindu fyrir lífríkið að það sé vel brugðist við.