Hjúkrunarfræðingar komnir með lokaboð frá ríkisvaldinu

Hjúkrunarfræðingum hefur verið tilkynnt hvað ríkisvaldið er tilbúið að ganga langt til að bæta launakjör þeirra hjá Landspítalanum. Elsa B. Friðfinnsdóttir formaður Félags hjúkrunarfræðinga var boðuð á fund í fjármálaráðuneytinu í gær þar sem því var skýrt komið á framfæri hvað stjórnvöld væru reiðubúin að setja í jafnlaunaátak stjórnvalda og sú afstaða var síðan ítrekuð á fundi samráðsnefndar spítalans í morgun.

„Við ætlum að heyra í okkar baklandi í hjúkrunarfræðingunum sjálfum hvernig þeir meta það sem hefur verið í boði. Við höfum verið að vinna þetta í algjörum trúnaði í samstarfsnefndinni," segir Elsa í samtali við Bylgjuna.

Elsa vill ekki tjá sig um hvort þetta sé líklegt til árangurs áður en tilboðið hefur verið kynnt félagsmönnum á mánudag og eftir næsta samráðsfund á þriðjudag. En uppsagnir um 260 hjúkrunarfræðinga taka gildi hinn 1. mars næst komandi.

„Það var alveg skýrt að þetta væru þær fjárhæðir sem stjórnvöld treystu sér til þess að leggja í þessa endurskoðun," sagði Elsa B Friðfinnsdóttir formaður Félags hjúkrunarfræðinga.