Borgarstjóri Reykjavíkur, Jón Gnarr, vandar þeim ekki kveðjurnar sem leggja ökutækjum sínum uppi á gangstéttum borgarinnar.

"Þetta er alveg yfirgengilegt og myndi ekki líðast í nokkurri borg," segir borgarstjórinn, en á mánudag greindi Vísir frá strembinni gönguferð mæðgna í Reykjavík. Í göngunni þurfti móðirin í fjórgang að fara með hjólastóla dætra sinna út á akbrautir vegna bifreiða sem lagt var uppi á gangstéttum.

„Ef þú myndir leggja bílnum þínum uppi á gangstétt í Kaupmannahöfn og skilja hann eftir, væri búið að draga hann í burtu tíu mínútum seinna."

Jón segir borgaryfirvöld hafa óskað eftir því við innanríkisráðuneytið að Bílastæðasjóður fái heimild til að láta fjarlægja ökutæki sem lagt er ólöglega, og sérstaklega þeim ökutækjum sem lagt er uppi á gangstéttum.

„Það þarf ekki lögreglumann til að vega og meta það hvort bíl sem er ólöglega lagt uppi á gangstétt sé ólöglega lagt uppi á gangstétt," segir Jón, en hann hefur undanfarið gengið með spjöld í vasanum sem hann hikar ekki við að láta undir rúðuþurrkur stöðubrotafólks.

„Við létum útbúa spjöld í samstarfi við Blindrafélagið, Öryrkjabandalagið og Félag eldri borgara, sem hægt er að fá hjá borginni og setja undir rúðuþurrkur bíla. Á þeim stendur: „Þú hefur lagt bílnum þínum þannig að hann hindrar aðgengi blindra, fatlaðra og annarra gangandi vegfarenda. Sýndu tillitsemi - legðu löglega," og ég hef séð þetta bera árangur."

Jón segir borgaryfirvöld þó óska eftir skilvirkari leið við að fá ökutæki fjarlægð, og enn hafa bílastæðaverðir borgarinnar enga heimild til þess að láta draga bifreiðar á brott. Hann biðlar því til ökumanna að láta af þessari hegðun.

„Ég vil bara hvetja alla þá sem leggja ólöglega til þess að íhuga hvað það hefur leiðinlegar, og jafnvel skaðlegar afleiðingar fyrir aðra í för með sér. Þetta er ömurlegur ósiður sem þarf að útrýma hér."