Tromsö eins og að flytja heim á Ísafjörð

Ráðning Íslendings sem framkvæmdastjóra skrifstofu Norðurskautsráðsins er viðurkenning fyrir framlag Íslands til Norðurslóða, segir Magnús Jóhannesson, sem tók við starfinu í vikunni. Íslendingar buðu fram Reykjavík undir höfuðstöðvarnar en Tromsö hafði betur.

Þjóðfánar þeirra átta ríkja sem mynda Norðurskautsráðsráðið voru leiddir fram við athöfn sem markaði stofnun fastaskrifstofu ráðsins. Aðildarlönd eru þau sem eiga lögsögu norðan heimskautsbaugs; Bandaríkin, Rússland og Kanada ásamt Norðurlöndunum.

Með staðsetningu í Tromsö er Norðmönnum að takast að gera borgina að einskonar höfuðborg Norðurslóða. Íslendingur verður þó í lykilhlutverki.

Magnús Jóhannesson undirritaði ráðningarsamning sem fyrsti framkvæmdastóri en hann var áður ráðuneytisstjóri umhverfisráðuneytis. Magnús undirritaði síðan samning við utanríkisráðherra Noregs um að það verði heimaríki skrifstofunnar en við háborðið sátu einnig utanríkisráðherra Svíþjóðar og Norðurslóðaráðherra Kanada.

Spurður hvort ráðningin væri ekki mikill persónulegur heiður svaraði Magnús í fréttum Stöðvar 2 að þetta væri ekki síður viðurkenning fyrir metnaðarfulla stefnu Íslendinga í málefnum Norðurslóða.

Íslensk stjórnvöld kepptu hins vegar um að höfuðstöðvarnar yrðu í Reykjavík en Tromsö hafði betur í því kapphlaupi. Magnús kveðst ekki vita hversvegna Reykjavík varð undir en kvartar ekki undan því að flytja til Tromsö.

„Þetta er nú bara eins og smábær á Vestfjörðum. Ég er fæddur og uppalinn á Ísafirði og mér finnst ég að sumu leyti vera kominn heim."

Verkefni Magnúsar fyrstu mánuðina verður að koma skrifstofunni á fót í Tromsö og ráða nokkra starfsmenn. Markmiðið er að starfsemin verði komin á fullt í maímánuði í vor.